كل سنه وانتوا سالمين

كل سنة وانتوا سالمين


،أم فوزي: مممموه، اهلين اهلين يأم انور

وانتي سالمة وغانمة حبيبتي، بنعاد عليكي

بالصحّة وهداة البال

شو هاد الله يسامحك؟ والله ما كان في

داعي تغلبي حالك

أم انور: وانتي سالمة يختي، ولو، فش اشي

من قيمتك

أم فوزي: تفضلي حبيبتي، خدي من هاي

الدهبية، زاكية

أم انور: بالله تعفيني يا سماهر، من الصبح واحنا نلفلف، انهلكنا معمول وقهوة وشوكالاطة، الحرئة دبحتني


أم فوزي: لأ محنا عاملين حسابنا، هادول التيرموسين واحد فيه قهوة سادة، والتاني في اينو تبع الحرئة، مدّي ايدك

يا بنت الناس

قوم يا فوزي صب قهوة لخالتك ام انور

:في المطبخ، فوزية وام فوزي بتهامسوا

ولك افتحي هال كيس نشوف شو جابت ام انور

يع يع، شو هااااد!!! طئم فناجين قهوة، لأ ولونو ازرء سماوي كمان! هو انا بدّي احطّه بالحمّام يعني! يئطعك

ويئطع زوئك يا ام انور شو انه مئلعط

معلش يمّه، بناخدوا لام اشرف بس نروح نباركلها بالعمرة، لأ وميد إن شاينا كمان، مش مسترخصة

بالمرة خالتي ام انور

والله اولتك، خلص خلّيه على لفتو تفتحيهوش

أم فوزي: يسّلم ايديكي يا ام انور، كتير بيجنّن الطئم، ولونو كتير كلاس، لأ بعدين صيني، والصين معروفة بالطئوم

الميلامين المفتخرة، جد غلّبتي حالك

أم أنور: ولو يختي، لا غلبة ولا اشي، فش اشي من قيمتكوا، كل سنة وانتوا سالمين
______________________

أم اشرف: ممممموه، اهلين يام فوزي، منّا ومنّك حبيبتي، والله دعيتلك انتي واولادك عند الحرم، ودعيت لزوجك

السكرجي انه الله يهديه، والله ما كان الو داعي تغلبي حالك

ام فوزي: الله يسعدك حبيبتي، ولو، فش اشي من قيمتك

فوم يا اشرف صبّ ميّة زمزم لخالتك، الله وكيلك تازة، ما صاريلها يومين

بالمطبخ، شريفة وام اشرف بيتوتوتوا

افتحي شوفي شو جايبة معها سماهر

لا حول ولا قوّة إلا باللهّ اي ما سدّئنا عالله خلصنا من اخر طئم فناجين قهوة مئلعط اجانا، لمّا اخدناه لأم انور يوم طهور

ابن ابنها، يجينا واحد تاني؟

لأ ونفس اللوّن، كنّه هاد اللون الدارج هاليومين

لا حول ولا، يالله مش مشكلة، خليّه على لفتو، بركي اخدناه لام فتحي، مهي بالمستشفى والمفروض تطلع هاليومين

انا مش زعلان غير عطقم هالفناجين، اللي ما حاد مستنضف يفتحوا ويستعملوا

By: bandovan
Date: 6th November 2005